Dr Fasnachtszeedel vo den Antygge 2024
Als Zeedeldichter ischs eso
S duet jeerlig als en E-Mail ko
Vom Sujet-Obma Schregstrich Frau
Und die wänn denne ganz genau
Denn wisse ob ych ooni Fruscht
Dr Zeedel schriib no im Auguscht
E jedes Joor – es isch zem Gruuse
Sugsch Värsli us de Finger uuse
De kämpfsch mit Ryym und Värsmass au
Und lääse duet en zletscht kai Sau
Daas Joor isch s Sujet KI dra
Es hilft drum ain wo alles ka
Woby me waiss jo nid genau
Jä ischs e Maa, jä ischs e Frau
Jä oder sone Gender-Stärn
Das isch jo hitzuedaag modärn
Drum hilft mir daas Joor dodrby
Das neye Dings Tschät-GPT
Ych sag däm, loos jetz Digge gäll
Ych bruuch e Zeedel und zwor schnäll
Uf baseldytsch jä sott är si
Und s Sujet haisst drzue KI
Drno bruuchts denn e Zyt e bitz
Und s Resultat isch – dasch kai Witz
Bis dä KI s denn duet usspugge
Mir dien Eych s Resultat jetz drugge:
D KI seit zu mir: „Ich bin de neui Hit
Aber mini Brüetsch, die find ich nid mit
Sie suecht im Internet und in jede Eck
Aber mini Brüetsch, die isch weg, oh Schreck
Ouh hoppla han y dänggd und shit
Fir die Antygge längt das nid
Wäg däne glatte KI-Kälber
Jä schrib en drum halt nomol sälber
Das Bispiil do zaigt mit aim Satz
Das KI isch denn kai Ersatz
Fir Humor und au firs Dichte
Mir leen ys dorum nid verpflichte
Vo some Dings-Bums-Alleskenner
Dr Zeedel wird eso kai Renner
Mr draie s KI dorum um
Und wärde so drby zum
IK – und mutiere denn – lyycht finschter
Zue Intelligänte Kinschtler
Unsri Kunscht isch: Mir leens lo krache
Wenn mir Antygge Fasnacht mache
S bruucht unseri Kunscht e gar kai Code
Jä wenns am vieri denn als afot
Doch ainewäg hänn mir binär
Esone Code gmacht und s isch schwär
Dä mit ere Cyber-Atagge
An dr Fasnacht denne z gnagge
Doch wär das ainewäg denn schafft
Bekunnt e Passiv-Mitgliedschaft
Das Cyber-Zyyg isch jo en vogue
Doch mir rötze ganz analog
Mit Härz und Fyyr und au mit Fraid
KI isch uns so lang wie brait
Dr Durscht bi uns dä isch brutal
Dä lesche mir nid digital
He nai mir geen do als ganz kegg
Jä allewyyl denn ins Schofegg
Und stoossen denn uff d Frindschaft a
Dasch öbbis wo KI nid ka
Mir stoossen a uff unsri Clique
Uff d Fasnacht und uff die Antygge